Mat 2 | KYG | STEP | Maliya'a Yesu'mo Metelehamu taonifi'mo Yuta kotegamo Heloti'a kini ne'mo mai'neno vaya'aite'mo yagaino ne'apateya afina'mo alino ate'niye. Alino ate'nige'apae'mo kanefi'mo alagepa hu'a ne'agaya vaya'mo yegemo haine ne'eya kotegati'mo e'a Yulusalemu taonifi'mo ava'yi hute'apae'mo,

Matthew 2

Mago agete'a afi'naya vaya'mogimo e'a Yesu'mo age'naya gemae

1 Maliya'a Yesu'mo Metelehamu taonifi'mo Yuta kotegamo Heloti'a kini ne'mo mai'neno vaya'aite'mo yagaino ne'apateya afina'mo alino ate'niye. Alino ate'nige'apae'mo kanefi'mo alagepa hu'a ne'agaya vaya'mo yegemo haine ne'eya kotegati'mo e'a Yulusalemu taonifi'mo ava'yi hute'apae'mo, 2 Yu vaya'aite'mo yagaino apatesiya kini ne'mo saufamo alino ate'niya mafa'nemo haiya'ale'mo mai'niye. Lagaemo agae kanefi'mo yegemo haine ne'eya kotegati'mo ageteta agaefe'mo mono hisunafe'mo agaetegamo ne'one, hu'a hu'nae.

3 Heloti'a yagaino ne'apateya kini ne'mo'a ani gemo afiteno'ae'mo hausoli hu'nige'apae'mo muki Yulusalemu taonifi'mo mai'naya vaya'mogi'e'mo ani kava hu'a hapausoli hu'nae. 4 Heloti'a mono hu'a ne'apataya vaya'aite'mo yagai'a ne'apataya vaya'aifenagi ke'aepa gemo avo'mo kae'a ali'a apaya ne'malaya vaya'aifenagi huno keya aeno ge hu'nige'a e'a ali'a anupa hu'a mai'nageno'ae'mo, Kalaisi ne'mo haiya kotegati'mo afole aigiye hu'a hu'nae, huno apafi ge'nige'apae'mo, 5 Metelehamu taonimo Yuta kotegati'mo afole aigiye. Gotitegati gemo alinineno aeno hakalo huno hapa nepaiya vekamo'a huno'ae'mo,

6 Kagaemo Metelehamu taoniyo, huno, Yuta kotega taoniyo, huno, vaya'mogimo sipisipile'mo ne'yagaiya kava huno Isaleli vaya'nile'mo yagaino apatesiya ne'mo kagaepati'mo afole aigiya'mofe'mo Yuta vaya'aite'mo yagai'a ne'apataya vaya'ai apaulagale'mo afa taonimo ohane'nanage'a muki taonimogi ae'a kaga ose'nae, huno avo'mo kae male'niye,
hu'a ha pai'nae.

7 Ha pai'nageno ani gemo afiteno'ae'mo agete'a afi'naya vaya'aife'mo fala kino ge hu'nige'a e'a ali'a anupa hu'a mai'nageno'ae'mo, hainu afina'mo kanefi'mo afole ai'niye, huno apafi ge'niye. 8 Agaemo Metelehamu taonifilagamo alino apateteno'ae'mo, alagepa hutapa uteta hutapa kahauya hutapa ani mafa'nemo agetapa avateyo. Nagae'e'mo u'na mono hisuvafe'mo agetetapae'mo etapa naha paiyo, huno hapa pai'niye.

9 Ani gemo afite'apae'mo atale u'a agayana hogote'a yegemo haine ne'eya kotegati'mo age'naya kanefi'mo halate uno hogote'nige'a age'nageno uno saufa mafa'nemo mai'niya yate'mo hane'niye. 10 Hane'nige'a agete'apae'mo lusi kava hu'a apamogaga aime aime u'nae. 11 Apakaemo nopi'mo hai'a anakayana mafa'ne'a'e ita'amo'mo Maliya'e'mo mai'na'age'a anakete'apae'mo apale'ya fai'ne'a ape hu'a Yesufe'mo mono hu'nae. Kesi'apifati'mo yaki'a goli yafanagi lusi monileti'mo miya nefaiya ya'mo ali'a atafi'mo kae'nageno alagepa atumo ne'aiya yanagi alagepa atumo ne'aiya uvelimogi hu'a ali'a ami'nae.

12 Goti'a alagamuna kategati'mo hapa paino'ae'mo, Helotitegamo halate atagi netapa o'viyo, huno hapa pai'nige'a atale'a alu kateti'mo ko'apilegamo u'nae.

Apaune he'a Isipi kotegamo u'naya gemae

13 Apakaemo utageno Yosefe'a alagamuna age'niyana Ala kava ne'mo enisole ne'amo'mo, he tika mafa'ne'a'e ita'amo'e'mo anavalelika kaune heka Isipi kotegamo uvo. Heloti'a ani mafa'nemo amagisiyafe'mo kahauya nehiyanagi anavalelika uka Isipi kotegamo nagava mai'nege'nao kaha paino, huno ha pai'niye.

14 Yosefe'a aupati'mo he tino hani'ilagamo mafa'ne'a'e ita'amo'e'mo anavalelino Isipi kotegamo u'niye. 15 U'a mai'nageno'ae'mo Heloti'a ago fali'niye. Ani kava huno Ala kava ne'mo'a agaetegati gemo alinineno aeno hakalo huno hapa nepaiya vekamo avayafati'mo hu'niya gemo afole ai'niye. Ani gemo'mo huno'ae'mo,Nagaemo keya ae'na ge hu'nogeno mafa'ne'nimo Isipi kotegati'mo e'niye, huno avo'mo kae male'niye.

16 Heloti'a agesa afi'niyana, agete'a afi'naya vaya'mogimo humi natete'a nagesasi hu'a u'nae, huno huteno lusi kava huno aipamo le'niye. Agaemo, Metelehamu taonifi'e Metelehamu haopalega'e'mo uteta hutapa muki ve mafa'ne anaga'mo lole kafugamo o'mai'nisaya ve mafa'ne anaga'mo apamagige'a faliyo, huno hapa pai'niye. Agaemo agete'a afi'naya vaya'mogimo ani afina'mo kanefi'mo afole ai'nigeta age'none, hu'a ha pai'naya ge'apie'mo agesa afi'niya'mofe'mo ani gemo hu'niye. 17 Ani afina'mo Yelemaiya'mo Gotitegati gemo alinineno aeno hakalo huno hapa nepaiya vekamo avayafati'mo hu'niya gemo afole ai'niye. 18 Ina gemo'mo huno'ae'mo,

Lama taonifati'mo apakemo ai'nage'a afi'nae. Yulagefa aige avi'ya huge hu'nage'a afi'nae. Leso'a mafa'ne anaga'ae'mo avi'ya huno apate'niye. Mafa'ne anaga'amo ago fali'naya'mofe'mo aipamo ali'a falu hu'a atesayafe'mo hu'nayana o'afi'niye,
huno avo'mo kae male'niye.

Isipi kotegati'mo atagi ne'a Nasalasa taonifi'mo e'a mai'naya gemae

19 Heloti'a ago falitegeno'ae'mo Yosefe'a Isipi kotegamo mai'neno'ae'mo alagamuna ageyana Ala kava ne'mo enisole ne'amo afole ai'nigeno age'niye. 20 Agaemo ha paino'ae'mo, mafa'nemo amagisayafe'mo hu'naya vaya'mo ago fali'nayanagi he tika mafa'neka'e ita'amo'e'mo anavalelika Isaleli kotegamo uvo, huno ha pai'niye. 21 Ha pai'nigeno Yosefe'a aupati'mo he tino mafa'ne'a'e ita'amo'e'mo anavalelino uno Isaleli kotegamo mai'niye.

22 Akaleyasi'mo afo'amo Heloti aimu'yale'mo mai'neno yagaino ne'apate, hu'a hu'nageno Yosefe'a afiteno Yuta kotegamo uno maisiyafe'mo koli hu'niye. Alagamuna ageyana Yuta kotegamo uka o'maiyo, huno ha pai'nigeno afiteno'ae'mo Galeliya kotegamo uteno 23 Nasalasa taonifi'mo uno mai'niye. Gotitegati gemo alini e'a ae'a hakalo hu'a hapa nepaiya vaya'mogi hu'apae'mo, Nasalasa vekae, hu'a agi aegae, hu'a hu'naya gemo afole aisiyafe'mo Nasalasa taonifi'mo uno mai'niye.